الجريب فروت والأدوية التي يتعارض معها
الجريب فروت, طبعا معظمنا يعرفه, فاكهة حمضية من عائلة الموالح, زى البرتقال والليمون, لها فوايد كتير جدا, لكن لها مشكلة مهمة جدا, مش ناس كتير تعرفها.
علشان كده من خلال الموضوع ده, دكتور كشكول هيعرض لحضراتكم بعض المعلومات عن مشكلته دى, اللى ممكن أى حد يقع فيها, وتحصله مضاعفات خطيرة بسببها بدون ما يعرف.
دكتور أحمد خالد توفيق الله يرحمه, كتب رواية من سلسلة سافارى, عن خبيرة تغذية, بتتزوج الرجال الأغنياء, وبعد كده بيموتوا, فتورثهم.
وكانت تقارير تشريحهم بتثبت إن وفياتهم طبيعية جدا, وتفسيرها الوحيد, بمفهومنا الشعبى, إنها ست نحس, كل ما تتزوج شخص يموت, عادى جدا, بتحصل.
إمكانية القتل بتفاعلات الدواء مع الغذاء
الزوجة دى فى الواقع, كانت بتقتل أزواجها, بطريقة لا يمكن حد يشك فيها ولا يثبتها عليها, كانت بتشوف كل واحد منهم, إيه الأدوية اللى بياخدها بشكل مستمر لأنها بتتزوج رجال مرضى بأمراض مزمنة, وتحرص على إنها تديلهم يوووميا أطعمة أو مشروبات تتفاعل معاها بشكل يحولها لسموم, وبتكون حجتها إنها خبيرة تغذية, وحريصة على إنها تديلهم أغذية مفيدة لصحتهم, فتكون النتيجة إنهم بعد كام شهر, يموتوا, وتورث هى ثرواتهم.
تفاعلات الغذاء مع الدواء وخطورتها
متستغربوش حضراتكم, ده ممكن يحصل, فعلا فيه أغذية, إذا تم تناولها مع أدوية معينة فى نفس الوقت, يحصل تفاعل بينهم ينتج عنه آثار جانبية ممكن تكون قاتلة.
علشان كده, دكتور كشكول بينبه حضراتكم لإمكانية حدوث تفاعلات خطيرة للغذاء مع الدواء, وأشهر وأهم مثال على ده, الجريب فروت.
اذا كنت يا عزيزى القارىء من عشاق الجريب فروت, وبتاكله أو تشربه كل يوم, مفيش مشكلة, لكن لما تروح لطبيب, لازم تقوله الحكاية دى.
علاقة الجريب فروت بالأدوية
الجريب فروت بيتفاعل مع بعض الأدوية تفاعلات ممكن ينتج عنها إما إلغاء تأثير الدواء فيبقى بدون فايدة, أو زيادة تراكم الدوا فى الجسم بشكل يحوله فى النهاية لسم.
خاصة فى حالات الأمراض المزمنة اللى العيان فيها بيعتمد على الدوا لفترات طويلة قد تمتد لمدى حياته, وكان العيان ده نفسه مدمن جريب فروت ومبيفوتش يوم من غير ما ياكله أو يشربه.
فى الحالة دى, لازم اما الطبيب ينبه على المريض إنه يفصل الجريب فروت عن الدوا بفاصل ساعتين, أو يتفاوض معاه فى إمكانية إنه يقلع عن إدمان الجريب فروت, أو يغيرله الدوا إذا كان فاصل ساعتين مش كفاية والعيان عاشق للجريب فروت وميقدرش يعيش من غيره.
أهم الأدوية التى تتفاعل مع الجريب فروت
من أهم الأدوية دى:
- بعض المضادات الحيوية.
- المضادات الفيروسية وخاصة أدوية الأيدز.
- المنشطات الجنسية.
- بعض أدوية إرتفاع ضغط الدم.
- أدوية خفض كوليسترول الدم.
- أدوية القلب وخاصة الديجيتالس (ديجوكسين).
- مضادات القلق والإكتئاب.
- أدوية الصرع.
- أدوية دوار الحركة.
- أدوية منع رفض الأعضاء المزروعة.
- بعض مسكنات الألم.
- بعض أدوية الكحة.
- الهرمونات التعويضية ماعدا الإنسولين.
وبصفة عامه, أى مريض هيتكتبله دواء, ويكون بياخد جريب فروت, دكتور كشكول بينصحه إنه لازم يبلغ الطبيب أو الصيدلى علشان يعرف منه موقف الدوا اللى هياخده من الجريب فروت.
